Sunnudaginn 27/6 kl. 15:47 voru slökkviliðsmenn á Egilsstöðum kallaðir út í bílslys á þjóðvegi 1 á svokallaðri Háreksstaðaleið. Slysið varð rétt vestur af Háreksstöðum eða um 70 km frá Egilsstöðum. Tilkynnt var um að tveir hafi verið í bílnum. Annar var fastur í bílnum og þurfti því að beita björgunarbúnaði til að ná honum út. Báðir voru fluttir í sjúkrabíl á Egilsstaði og síðan með sjúkraflugi til Reykjavíkur.

Frétt sem náðist ekki að setja inn fyrr en núna.

Slökkviliðið á Egilsstöðum var kallað út vegna elds í Fellabakarí á Fljótsdalshéraði. Þegar komið var á staðinn var um mikinn eld að ræða í starfsmannarými og var það farið að ná upp úr þaki hússins. Þar sem útlit var fyrri að hér væri líkur á stórbruna voru slökkvilið innan Brunavarna kölluð út frá Vopnafirði og Seyðisfirði. Þá var óskað eftir aðstoð frá Slökkviliði Fjarðabyggðar sem sendu fullmannaðan slökkvibíl á staðinn. Einnig voru björgunarsveitarmenn á Héraði kallaðir út í vatnsöflun en samningur er til um slíkar beiðnir.Slökkvistarf gekk vel og var lokið um tveimur tímum frá að útkall barst. Sjá frétt frá Austurglugganum hér og frétt á ríkisútvarpi hér

12 slökkviliðsmenn Brunavarna á Austurlandi sóttu námskeið í brunamálaskólanum sem haldið var á Djúpavogi um síðustu helgi. 3 slökkviliðsmenn sóttu námskeiðið frá Langanesbyggð og þar af sjálfur slökkviliðsstjórinn Axel Gunnarsson.

Allir slökkviliðsmenn á Djúpavogi sóttu námskeiðið og með því luku þeir allir námi í brunamálaskólanum ásamt einum slökkviliðsmanni frá Egilsstöðum. Þetta er lofsverður árangur  slökkviliðsmanna á Djúpavogi og mikill styrkur fyrir samfélagið að vita af þeirri faglegu þekkingu sem slökkviliðsmennirnir hafa aflað sér á mjög skömmum tíma í Brunamálaskólanum.

Hluti af náminu fór fram í eldgámi sem Brunavarnir á Austurlandi eiga og hefur verið lánaður Slökkviliði Fjarðabyggðar undanfarin ár vegna þjálfunar atvinnuliðsins þar. Slökkviliðsmenn Fjarðabyggðar tóku vel á móti okkar mönnum og lánuðu slökkvibíl og annan búnað og  myndirnar sem hér fylgja eru teknar við slökkvistöðina á Reyðarfirði. Sjá myndir hér